​លោកអ្នក​ប្រហែលជា​ធ្លាប់​បានគិត​ហើយ​ថា ការបោះបង់ចោល​ការសិក្សា ជា​ជម្រើស​មិនល្អ ដែល​ធ្វើ​ឲ្យ​លោកអ្នក​បាត់បង់​ឱកាស ទទួលបាន​ការងារ​ល្អៗ តែមាន​បុគ្គល​ជោគជ័យ​មួយចំនួន ដែល​បាន​បោះបង់ចោល​ការសិក្សា ហើយ​ចាប់យក​ឱកាស​ក្នុង​ពិភព​អាជីវកម្ម និង​ទទួលបាន​ជោគជ័យ​។ យើងខ្ញុំ​នឹង​ស្រង់​យកគំនិត​ល្អៗ ពី​មហាសេដ្ឋី ៣​រូប ដែល​មិនបាន​បញ្ចប់​ការសិក្សា មក​បង្ហាញ​ដូចខាងក្រោម​៖

១. លោក John D. Rockefeller៖ កុំ​ភ័យខ្លាច​នឹង​លះបង់​របស់​ល្អ ដើម្បី​ចាប់យក​របស់​ដ៏​អស្ចារ្យ​
​លោក John D. Rockefeller ជា​មហាសេដ្ឋី​សញ្ជាតិ​អាមេរិកាំង ដ៏​ពូកែ​ម្នាក់ ដែល​មិនបាន​រៀន​ចប់​ថ្នាក់​វិទ្យាល័យ ប៉ុន្តែ​អាច​សិក្សា​មហាវិទ្យាល័យ​ផ្នែក​ពាណិជ្ជកម្ម មុនពេល​ដែល លោក​បានចេញ​ស្វែងរក​ការងារ តាំងពី​អាយុ ១៦​ឆ្នាំ រហូតដល់​លោក​បាន​ក្លាយជា ស្ថាបនិក​ក្រុមហ៊ុន​ប្រេង​ដ៏​ធំជាងគេ នៅ អាមេរិក ហើយ​មានទ្រព្យ​សម្បត្តិ​ផ្ទាល់ខ្លួន​សរុប​ចំនួន ៣៤០​ពាន់​លាន​ដុល្លារ​អាមេរិក​។​

​ឃ្លា​មួយ​របស់លោក John D. Rockefeller តែងតែ​លើកឡើង​សម្រាប់​សាធារណៈជន នោះ​គឺ កុំ​ភ័យខ្លាច​នឹង​លះបង់​របស់​ល្អ ដើម្បី​ចាប់យក​របស់​ដ៏​អស្ចារ្យ មានន័យថា កុំ​ស្ទាក់ស្ទើរ​ក្នុងការ​ចាប់យក​ឱកាស​ដែល​ប្រសើរ​ជាង អ្វីដែល​លោកអ្នក​កំពុង​តែមាន​។​

២. លោក Henry Ford៖ កុំ​ស្វែងរក​កំហុស ស្វែងរក​សំណង​
​រថយន្ត Ford ដំបូង​គឺ​បង្កើតឡើង​ដោយ​លោក Henry Ford ក្នុង​ឆ្នាំ ១៨៩៦ ហើយ​លោក​មានទ្រព្យ​សម្បត្តិ​សុទ្ធ​ចំនួន ១៩៩​ពាន់​លាន​ដុល្លារ​អាមេរិក​។ ប្រវត្តិ​លោក Henry Ford ដើមឡើយ​ជា​កូន​កសិករ​ម្នាក់ ដែល​រូបលោក​បាន​ចាក​ចេញពី​គ្រួសារ និង​បញ្ឈប់​ការសិក្សា​ត្រឹម​ថ្នាក់​វិទ្យាល័យ នៅពេលដែល​លោក​មាន​អាយុ ១៦​ឆ្នាំ​។ តាំងពី​តូច លោក​ជា​ក្មេង​រពឹស​ម្នាក់ ដែលមាន​ចំណង់​ចិត្ត​ខាង​ជួសជុល ដល់ពេល​ធំ​ឡើង​លោក​ចាកចេញ ដើម្បី​ស្វែងរក​ការងារ​នៅក្នុង​ហាង​ម៉ាស៊ីន ក្រោយមក​លោក​ក្លាយជា មេការ​វិស្វករ​នៅក្នុង​ក្រុមហ៊ុន Edison Illuminating​។​

​លោក Henry Ford ជា​បុគ្គល​ម្នាក់​ដែល​ធ្លាប់​បរាជ័យ​រាប់មិនអស់ ក្នុង​ខ្សែជីវិត​របស់លោក ប៉ុន្តែ​លោក​មិនដែល​ចុះចាញ់​នោះឡើយ​។​

​ឃ្លា​មួយ​របស់ Henry Ford ដែល​តែងតែ​និយាយ គឺថា កុំ​ស្វែងរក​កំហុស ស្វែងរក​សំណង នេះ​ចង់​បញ្ជាក់ថា មនុស្ស​គ្រប់គ្នា​ធ្វើ​អ្វី​ក៏ដោយ​តែងតែមាន​កំហុស មិនអាច​គេចផុត​ឡើយ ដូច្នេះ​ចូរ​រៀន​សិក្សា​ពី​កំហុស ដើម្បី​ទទួលបាន​ផលចំណេញ​ត្រលប់​មកវិញ កុំ​ព្យាយាម​ចាប់កំហុស ស្តីបន្ទោស តែ​មិនបាន​អ្វី​មកវិញ​។​

៣. លោក Amancio Ortega៖ កុំ​កំណត់​ខ្លួនឯង ឲ្យ​បន្ត​ដើរ​លើផ្លូវ ដែល​ទើបតែ​បើក​ថ្មីៗ​
​កាលពី​អាយុប្រមាណ ១៤​ឆ្នាំ លោក Amancio Ortega បាន​ឈប់​ពី​ការសិក្សា មក​ចាប់ផ្ដើម​អាជីវកម្ម​តូច​មួយ​ក្នុងស្រុក​។ ក្នុង​ឆ្នាំ ១៩៧៥ លោក​ជា​អ្នកបង្កើត​ម៉ូដ​សំលៀកបំពាក់​យីហោ Zara ដំបូងបង្អស់ រហូតដល់ Zara មានកេរ្តិ៍ឈ្មោះ​ល្បីល្បាញ​បំផុត ជុំវិញ​ពិភពលោក​មកទល់​សព្វ​ថ្ងៃ​។ លោក Amancio Ortega មាន​សញ្ជាតិ​ជា​ជនជាតិ អេ​ស្ប៉ា​ញ ដែលមាន​ទ្រព្យសម្បត្តិ​ប្រហែល ៧៤​ពាន់​លាន​ដុល្លារ​អាមេរិក​។​

​ឃ្លា​មួយ​របស់លោក Amancio Ortega ដើម្បី​ជោគជ័យ​គឺ កុំ​កំណត់​ខ្លួនឯង ឲ្យ​បន្ត​ដើរ​លើផ្លូវ ដែល​ទើបតែ​បើក​ថ្មីៗ មានន័យថា បើ​លោកអ្នក​រកឃើញ​ផ្លូវ​ថ្មី​មួយ ដែល​អាចជួយ​អភិវឌ្ឍ​លោកអ្នក​បាន​ហើយ កុំ​ឈប់​បន្ត​ស្វែងរក​ផ្លូវ​អភិវឌ្ឍ​ខ្លួនឯង​ទៅមុខទៀត គឺ​ត្រូវតែ​ផ្តល់ឱកាស​ឲ្យ​ខ្លួនឯង ស្វែងរក​ផ្លូវ​រីកចម្រើន​ទៅមុខទៀត រហូត​ទាល់តែ​រកឃើញ​ផ្លូវ​ជោគជ័យ​ពិតប្រាកដ​៕

​ប្រភព​៖ business-cambodia

​